841
writer1

Səhər Əhməd

Məqalə sayı

13
12:30 07 Avqust 2019

Biz bəndəsizik, Sən Allahsız!

Bəlkə biz səni görmədiyimiz kimi sən də bizi görmürsən, İlahi, şəkk eləmə, biz varıq, hamımız günahkarıq, bəlkə də, amma inan ki, hamımız çarəsizik...

***

Əlimdə altıqoşam ölür, vaxt bitmək üzrə, tanrım, soruşmaq ayıb olmasın, kimin əlinə oynayırsan?!

***

Allahım, öz “əsərini” oxunaqlı etmək xatirinə, müsbət qəhrəmanlarını çərlədib öldürmək şöhrətpərəst yazıçıların işidir.

***

Bəsdi, az sorğu-sual et, İlahi, günahım yoxdu. Cəzamı ver, çıxım gedim, sənin növbən uzundu, mənim vaxtım yoxdu...

***

İlahi, biz bəndəsizik, sən Allahsız!

***

İlahi, həyatın ideyasına o qədər də dəxli olmayan epizodik obrazlara bu qədər rəngarəng məzmunsuzluğu yükləmək çoxmu vacib idi?!

***

Tanrım, sən fani olmağın nə olduğunu hardan biləsən?!

***

İlahi, sənə elə gəlmir ki, bu ssenaridə nəsə yerində deyil, tez-tez çaşıram, rolumun sözlərini dəyişə bilərəmmi?!

***

Tanrım, axı mənim yola getmədiyim bu ömürlə kimlərsə xoşbəxt ola bilərdi...

***

İlahi, biz bu ömrü “qaralama” zənn edib, çoxlu səhvlər elədik, bir şans da ver, “ağlama” bir ömür yaşayaq...