449
14:34
28 İyul 2018

Ermənistan XİN: KTMT-nin baş katibi dəyişdiriləcək

Kollektiv Təhlükəsizlik Müqaviləsi Təşkilatının (KTMT) hazırkı baş katibi Yuri Xaçaturov Ermənistan tərəfinin xahişi ilə dəyişdiriləcək. İrəvan onun yerinə başqa bir namizəd irəli sürəcək.

Lent.az news.am-a istinadla bildirir ki, bu barədə Ermənistan Xarici İşlər Nazirliyinin sözçüsü Tiqran Balayan özünün şəxsi “tvitter” hesabında yazıb. Tiqran Balayan bildirib ki, təmsil etdiyi qurum artıq Xaçaturovun bir başqası ilə əvəz edilməsi üçün KTMT-yə müraciət edib və tezliklə bu barədə rəsmi məktub göndərməyə hazırlaşır: “Çünki hazırkı KTMT baş katibi Ermənistan qanunlarına görə mühakimə olunacaq. Özü də ciddi ittihamlarla. Xaçaturov tezliklə bir başqası ilə əvəz edilməlidir. Təşkilat da, biz də yeni baş katiblə bağlı namizədimizi təqdim edə bilərik. Hesab edirəm ki, prosedur tezləşdirilməlidir. Əks halda Kollektiv Təhlükəsizlik Müqaviləsi Təşkilatının fəaliyyətində bir müddətlik axsama yarana bilər”.

Qeyd edək ki, Kollektiv Təhlükəsizlik Müqaviləsi Təşkilatının baş katibi, Ermənistan Silahlı Qüvvələrinin sabiq rəisi Yuri Xaçaturov ölkənin konstitusiya quruluşunun devrilməsində təqsirli bilinir.