29
18:01
06 Sentyabr 2016

Sevgilisi ilə birləşib ərini yataqda öldürməkdə təqsirləndirilən qadın MƏHKƏMƏDƏ

Bu gün Bakı Ağır Cinayətlər Məhkəməsində həyat yoldaşını öldürməkdə təqsirləndirilən Lalə Mahmudova və sevgilisi Sədi Məmmədovun cinayət işi üzrə məhkəmənin növbəti iclası keçirilib.

Lent.az -ın məlumatına görə, hakim Əfqan Hacıyevin sədrliyi ilə qapalı keçirilən prosesdə təqsirləndirilən şəxs Sədi Məmmədov ifadə verib. O, ifadəsində qətli törətdiyini etiraf edib.

Prosesin qapalı hissəsi başa çatdığından jurnalistlər zala buraxılıb. Prosesdə qətlə yetirilən şəxsin qardaşı, hüquqi varis Elçin Mahmudov ifadə verib. O, ifadəsində təhlükəsizlik kamerasına baxdığını və qardaşının Sədi Məmmədov və qardaşı arvadı Lalə Mahmudova tərəfindən öldürüldüyünü deyib.

Proses sentyabrın 20-də davam edəcək.

Qeyd edək ki, qətl hadisəsi ötən il sentyabrın 26-da Yasamal rayonunda baş verib. Paytaxt sakini L.Mahmudova Yasamal Rayon Polis İdarəsinin 27-ci Polis Bölməsinə müraciət edərək həyat yoldaşı 39 yaşlı Kamran Mahmudovun itkin düşməsi barədə məlumat verib. Hadisədən 5 gün sonra K.Mahmudovun öldürüldüyü müəyyən edilib. Cinayətin mərhumun həyat yoldaşı L.Mahmudova və sevgilisi S.Məmmədov tərəfindən törədildiyini aşkara çıxarılıb. Hər 2 şəxs saxlanılaraq ifadələri alınıb. İstintaq araşdırmaları zamanı məlum olub ki, sentyabrın 26-da gecə saatlarında S.Məmmədov L.Mahmudovanın yaşadığı evə gəlib. Bu zaman mərhum Kamran Mahmudov və evdəki azyaşlı uşaqlar yatırmış.

L.Mahmudova ilə əvvəlcədən plan quran S.Məmmədov özü ilə gətirdiyi tapança ilə yatmış K.Mahmudovun baş nahiyyəsindən 3 dəfə atəş açaraq onu qətlə yetirib. Onlar izi itirmək məqsədilə meyiti hissələrə bölərək bağlamalara yığıblar. Sonra həmin bağlamalarla S.Məmmədov Bakıdan İsmayıllı rayonuna yola düşüb. O, meyiti İsmayıllı rayonunda meşədə basdıraraq Bakıya qayıdıb.

Xatırladaq ki, L.Mahmudova Bakıdakı xəstəxanalardan birində tibb bacısı işləyib, əri isə bizneslə məşğul olub.