38
15:07
24 İyun 2016

Aİ rəsmisi Qarabağ münaqişəsi ilə bağlı - Vəziyyət çox həssasdır

“Dağlıq Qarabağ münaqişəsi təhlükəsizlik nöqteyi-nəzərindən hətta Avropa və Avrasiya üçün fəsadlara səbəb ola bilər”.

APA-nın “news.am” saytına istinadən verdiyi xəbərə görə, bunu Avropa İttifaqının Ermənistandakı nümayəndəliyinin rəhbəri Piter Svitalski deyib.

P. Svitalski bildirib ki, regiondakı münaqişələr təhlükəsizliyə real təhdiddir: “Vəziyyət çox həssasdır. Ümid edirəm ki, münaqişənin sülh yolu ilə tənzimlənməsi istiqamətində Vyana sammitindən başlayan inkişafın şahidi olacağıq”.

Diplomat etimad quruculuğu tədbirləri, habelə təmas xəttində insidentlərin araşdırılması mexanizmi ilə bağlı effektiv nəticələrin qeydə alınacağına da ümidvar olduğunu diqqətə çatdırıb.

Qeyd edək ki, Dağlıq Qarabağ münaqişəsinin müasir mərhələsi 1988-ci ildə Ermənistan SSR-in Azərbaycan SSR-ə qarşı ərazi iddiaları əsasında başlayıb. 1991-1994-cü illərdə Azərbaycanın Dağlıq Qarabağ ərazisi uğrunda Ermənistanla Azərbaycan arasında şiddətli müharibə baş verib. Nəticədə Azərbaycan ərazilərinin 20 faizi - Dağlıq Qarabağ və ətraf 7 inzibati rayon (Laçın, Kəlbəcər, Ağdam, Füzuli, Cəbrayıl, Qubadlı, Zəngilan) Ermənistan Silahlı Qüvvələri tərəfindən işğal olunub, 1 milyondan artıq insan qaçqın və məcburi köçkün vəziyyətinə düşüb. Hərbi əməliyyatlar 1994-cü ilin may ayında Bişkekdə Azərbaycan və Ermənistan arasında imzalanmış atəşkəs sazişi ilə başa çatıb.

Dağlıq Qarabağ münaqişəsinin həlli ilə ATƏT-in Minsk qrupu məşğul olur. Qrup ATƏT-in Nazirlər Şurasının 1992-ci ilin 24 martında Helsinkidə keçirilmiş görüşündə yaradılıb. Qrupun üzvləri Azərbaycan, Ermənistan, Rusiya, Amerika Birləşmiş Ştatları, Fransa, İtaliya, Almaniya, Türkiyə, Belarus, Finlandiya və İsveçdir.

1996-cı ilin dekabrından onun Rusiya, ABŞ və Fransadan ibarət həmsədrlik institutu fəaliyyət göstərir.

Ermənistan qoşunlarının Dağlıq Qarabağdan qeyd-şərtsiz çıxarılması ilə bağlı BMT Təhlükəsizlik Şurasının 1993-cü ildə qısa fasilələrlə qəbul edilmiş 822, 853, 874 və 884 saylı qətnamələri, o cümlədən BMT Baş Assambleyası, AŞPA, ATƏT, İƏT və digər təşkilat və qurumların qətnamələri mövcuddur.