37
14:11
25 Oktyabr 2015

Gülnar Salmanova dəfn edildi - YENİLƏNİB

Azərbaycan Respublikasının Əməkdar artisi, Dövlət Musiqili Teatrının aktrisası Gülnar Salmanova bu gün Şəhər qəbirstanlığında dəfn olunub. Teatrın Mətbuat xidmətinin rəhbəri Samir Sədaqətoğlu Lent.az -a bildirib ki, dəfndən öncə mərhumənin evində cənazə namazı qılınıb. Azərbaycan Dövlət Musiqili Teatrının direktoru, Əməkdar incəsənət xadimi, sənətşünaslıq üzrə fəlsəfə doktoru Əliqismət Lalayev çıxış edərək Gülnar Salmanovanın sənəti, yaratdığı bənzərsiz obrazlar, Azərbaycan mədəniyyətindəki xidmətləri haqqında danışıb. Dəfn mərasimində Azərbaycan Respublikasının Mədəniyyət və Turizm Nazirliyinin rəsmi şəxsləri, Dövlət Musiqili Teatrının rəhbərliyi və bütün kollektivi, Gülnar Salmanovanın yaxınları və sənətini sevən sadiq tamaşaçıları iştirak edib. Habelə dəfn mərasimində Azərbaycan Akademik Milli Dram Teatrı, Dövlət Gənc Tamaşaçılar Teatrı, Dövlət Kukla Teatrı və başqa sənət ocaqlarının rəhbər şəxsləri və aktrisanın sənət dostları iştirak ediblər.
Qeyd edək ki, Gülnar Salmanova 1981-ci ildə Azərbaycan Dövlət İncəsənət İnsitutunun “Musiqili komediya aktyorluğu” fakultəsini bitirib. 1981-ci ildən Musiqili Komediya Teatrında çalışıb. Aparıcı səhnə ustası olub. Güclü və soprano səsə malik idi. Əsasən “Subretka” ampluasında çıxış edirdi. Aktrisanın "50 yaşında cavan” tamaşasındakı Gülnaz, “Beş manatlıq gəlin”də Naznaz, “Özümüz bilərik”də Ceyran, “Subaylarınızdan görəsiniz”də Çarliston, “Bankir adaxlı”da Maral, “Məhəbbət oyunu”nda Ceyran, “Aldın payını, çağır dayını” tamaşasındakı At Balaxanım və başqa obrazları orijinallığı ilə seçilib. Gülnar Salmanova 2001-ci ildə “Azərbaycan Respublikasının Əməkdar artisti” fəxri adına layiq görülüb. Prezident mükafatçısı idi.

``````

Ötən gün vəfat edən əməkdar artist Gülnar Salmanova ilə vida mərasimi keçirilir.

Lent.az -ın qafqazinfo-ya istinadən məlumatına görə, mərasim əməkdar artistin Arif Heydərov küçəsi, 25 ünvanında yerləşən mənzilində baş tutur.

Mərasimdən sonra mərhum şəhər qəbiristanlığında dəfn olunacaq.

Qeyd edək ki, G. Salmanova xərçəng və şəkərli diabet xəstəliyindən əziyyət çəkirdi. Oktyabrın 19-da səhhəti ağırlaşan aktrisa Mədəniyyət və Turizm Nazirliyi və Dövlət Musiqili Teatrının rəhbərliyinin köməkliyi ilə Sabunçu rayon Xəstəxanasının reanimasiya şöbəsinə yerləşdirilmişdi.