40
15:00
21 Oktyabr 2015

İlhamə Quliyevaya sui-qəsd hazırlayan Mehriban barədə əri danışdı: “Yoldaşımı mən bıçaqlamamışam” - MÜSAHİBƏ

Xalq artisti İlhamə Quliyevanın bir neçə gün öncə saxlanılan köməkçisi Mehriban Hüseynova Bəylərqızı barədə həyat yoldaşı Tofiq danışıb. Lent.az -a müsahibə verən Tofiq bəy həyat yoldaşı barədə sualları cavablandırıb:

- Həyat yoldaşınızın xalq artisti İlhamə Quliyevanın evindən oğurluq etdiyi deyilir...

- Mənim evimə oğurluq heç bir şey gəlməyib. Mən heç nə görməmişəm və belə bir şey də ola bilməz. Bu, sadəcə bizim ailəmizə atılan şər və böhtandır.

- Mehriban Hüseynova mətbuata açıqlama verib ki, İlhamə xanım onu bıçaqlayıb. Amma xalq artisti də söyləyir ki, şərdir, onu siz bıçaqlamısınız...

- (Sözümü yarımçıq kəsir...) Mən heç barmağımın ucu ilə də həyat yoldaşıma toxunmamışam. Həyatı boyu elə bir şey ola bilməz ki, mən onu bıçaqlayam. Həyatda Mehribandan çox istədiyim varlıq ola bilməz. Mənim üçün göydə Allah, yerdə həyat yoldaşımdır.

- Onda deyirsiniz ki, onu İlhamə xanım bıçaqlayıb?

- İndi orasını istintaqdan sonra biləcəyik. Hazırda istintaq gedir.

- Bu məsələ ilə əlaqədar İlhamə Quliyevaya zəng edib, yalvarmısınız?

- Mən ona yalvarmamışam. Onlar başqa yerə yozmasınlar. Sadəcə, mən İlhaməyə zəng elədim ki, ayıbdır, bu söhbətləri bu boyda şişirtməyin. Bunun üçün zəng etmişdim.

- Bununla bağlı harasa müraciət etmisiniz?

- Bəli, mən də, həyat yoldaşım da izahatımızı vermişik. İş gedir, özünüz də inşallah sonunu görəcəksiniz.

- Düşünürsünüz ki, xalq artisti İlhamə Quliyevanın söylədikləri şərdir?

- Əlbəttə ki, mənə də, yoldaşıma da şər atırlar.

- Bəs həyat yoldaşınız Mehriban Hüseynova indi hardadır?

- Mən özüm bilirəm həyat yoldaşım hardadır.