Sizin link burada

Ağdama uzaqdan baxmaq

 

Bir neçə gün əvvəl cəbhə xəttinə getmişdim. Ağdam istiqamətinə. Milli qəhrəmanlardan biri ilə bağlı filmin çəkilişləri üçün.

 

Uzaqdan Ağdamı çəkməliydik. Çəkdik. Biz gedə bilmədiyimiz yerlərə kameranın obyektivi getdi. Bacardığı qədər getdi...

 

Kamera çox sağa-sola vurnuxdu. Un kombinatının binasından və məscidin minarələrindən başqa heç nə görmədi. Və təbii ki, bizə də heç nə göstərə bilmədi.

 

Əslində kamera heç Ağdamı tanımırdı da. Özünün əsli Yaponiyadandı. Ağdam haqqında bizdən eşidirdi. Dedik get, bax, gör. Gördüklərindən bizə də danış.

 

Getdi. Baxdı. Amma heç nə danışa bilmədi.

 

Bizim ona anlatdığımız Ağdamdan əsər-əlamət görmədi. Deyəsən, bir az da təəccübləndi. Yenə bir az sağa baxdı. Yenə bir az sola baxdı. Heç nə görmədi.

 

Un kombinatının uçuq binası və məscid minarələridirmi Ağdam?

 

Yox, yox...

 

Ağdam...

 

Axı hanı?

 

Sonda əslən Yaponiyadan olan kamera ilə razılaşmalı olduq.

 

Ağdam yoxdu.

 

Amma Ağdam var idi. Nə vaxtsa mövcud idi.

 

İndi biz Ağdama uzaqdan baxırıq.

 

Biz uzaqdan baxdıqca Ağdam da yox olur. Cismən yox olur...

 

Hər dəfə Əfətli təpəsinə gedib Ağdama baxanda onun bir az daha yox olduğunu görürəm.

 

Ağdama uzaqdan baxdıqca, sanki o, bir az da uzaqlaşır. Çox qəribədir. Hər dəfə bundan əvvəl sanki daha yaxından görünürmüş kimi gəlir mənə.

 

Hər keçən il, hər keçən ay, hər keçən gün, hər keçən saat, hər keçən dəqiqə bizi uzaqlaşdırır Ağdamdan. Gözümüz baxa-baxa uzaqlaşdırır.

 

Bizsə gözləyirik.

 

Çəkilişimizi qurtarıb geri qayıdanda əslən Ağdamın Mərzili kəndindən olan keçmiş döyüşçünün maşını ilə qayıdası olduq. Yol boyu söhbətləşdik. Dedi çox ağırdı, burdan baxırıq, kəndimiz görünür, amma bu 5-10 kilometrlikdəki evimizə gedə bilmirik. Cavab vermədim. Susdum. Ürəyimdən keçəni deməyə qorxdum. Ümidini sındıraram deyə.

 

Amma sonra yenə fikirləşdim. Acı həqiqəti bilmək lazımdı. Həqiqət isə odur ki, bizi Ağdamdan kilometrlər yox, 25 işğal ili ayırır. Bundan sonra bizi Qarabağdan ayıran məsafəni kilometrlərlə yox, işğal ili ilə ölçün.

 

Hər işğal ili isə milyardlarla kilometrdən də uzaqdı...

 

 

LENT

23 May 2018

Digər xəbərlər >>>