Sizin link burada

Novxanıda öldürülən tələbə ilə bağlı YENİ XƏBƏR

Oktyabrın 12-də Novxanıda bağ evində əlləri və ayaqları bağlı şəkildə meyiti tapılan İran İslam Respublikasının vətəndaşı, Tibb Universitetinin müalicə-profilaktika fakültəsinin 5-ci kurs tələbəsi Möhtati Saman Nemət oğlu dəfn edilib. Lent.az xəbər verir ki, qətlə yetirilmiş 23 yaşlı tələbə atasının istəyi ilə Novxanı məzarlığında, anasının yanında torpağa tapşırılıb.

 

Hazırda faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə başlanmış cinayət işinin istintaqı davam etdirilir. S.Möhtatinin cəsədindən ekspertiza üçün vacib olan nümunələr götürülüb və çoxsaylı ekspertizalar təyin edilib.

 

Lent.az-ın əldə etdiyi məlumata görə, S.Möhtatinin əlləri və ayaqları bağlı şəkildə meyitinin tapıldığı ev onun atasına məxsusdur. Onun meyitini də həmin gün axşam evə gələn atası aşkarlayıb və dərhal polisə xəbər verib. İlkin müayinə zamanı onun bədənində hər hansı xəsarət aşkarlanmayıb. Belə ki, S.Möhtatinin bədənində hər hansı alətlə vurulma, boğulma və ya döyülməyə xas əlamət tapılmadığından ölüm səbəbini dəqiqləşdirmək də mümkün olmayıb.

 

Qeyd edək ki, S.Möhtati Azərbaycan Tibb Universitetinin müalicə-profilaktika fakültəsinin qabaqcıl tələbələrindən olub. Onun atası İran vətəndaşı olsa da, Saman Bakıda dünyaya gəlib və burada böyüyüb. Qətlə yetirilmiş iranlı tələbənin fotosunu təqdim edirik.

 

 

*****

 

Novxanı bağlarında meyiti tapılan şəxsin kimliyi müəyyənləşdirilib. Lent.az-ın hüquq-mühafizə orqanlarından əldə etdiyi məlumta görə, bağ evində əlləri və ayaqları bağlı şəkildə meyiti tapılan şəxsin İran İslam Respublikası vətəndaşı, 1994-cü il təvəllüdlü Möhtati Saman Nemət oğlu olduğu müəyyən edilib. Onun qətlə yetirildiyi dəqiqləşib və faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə iş başlanılıb.

 

Lent.az-ın əldə etdiyi digər məlumata görə, qətlə yetirilən əcnəbi Azərbaycan Tibb Universitetinin müalicə-profilaktika fakültəsinin 5-ci kurs tələbəsi olub. Onun kim tərəfindən, hansı şəraitdə, nə səbəbdən öldürüldüyü hələlik tam aydınlaşmayıb. Araşdırmalar davam etdirilir.

 

Lent.az qətlə yetirilən iranlı tələbənin fotosunu təqdim edir.

 

*****

 

10:09

 

Novxanı bağları yaşayış massivində yerləşən evlərdən birində meyit tapılıb. Lent.az xəbər verir ki, qəsəbədəki evlərdən birində əlləri və ayaqları bağlanmış şəkildə kişi meyiti aşkarlanıb. Məsələ ilə bağlı dərhal hüquq-mühafizə orqanlarına məlumat verilib. İlkin müayinə zamanı ölən şəxsin üzərində xəsarətlər aşkarlanıb. Həmçinin öldürülən şəxsin bütün əzalarının yerində olması da müəyyən edilib.

 

Hazırda qətlə yetirilən şəxsin kimliyinin müəyyən edilməsi, eləcə də hadisəni törədən şəxs və ya şəxslərin aşkarlanması istiqamətində iş aparılır.

 

Faktla bağlı Cinayət Məcəlləsinin 120-ci (qəsdən adam öldürmə) maddəsi ilə iş başlanılıb, əməliyyat-axtarış tədbirləri həyata keçirilir.

LENT

18 Oktyabr 2017
17 Oktyabr 2017

Digər xəbərlər >>>